Ka TUR ka pynpaw ia ka jinglyngngoh kaba khraw ia ka jingpyrshang jong I Mr. K. Hynǹiewta ban kynthoh bad pynshai jubor shaphang ka jingshem jong ka TUR halor ki jingtip kiba ka la ȉoh lyngba ka Aiǹ RTI. Kane ka jingpynshai bad jingkynnoh jong i Mr. K. Hynǹiewta lehse ka lah ban ȉalam bakla bad kam don nongrim satia, namar na ka liang jong ka TUR haba ka pan jingtip lyngba ka Aiǹ RTI bad ka jingpynlait paidbah ia ki jingtip, kam don kano kano ka jingthmu ban pynthohbria ne kynnoh kynta kumba la kam da i Mr. K. Hynǹiewta. Ka dei ka hok jong ki nong pan RTI ban ȉasam paidbah ia ki jingtip ba la lum thup lyngba ka RTI. Pynban kane ka jingkam bad jingkynthoh jong i Mr. K. Hynǹiewta ka dei ka jingpyrshang jong i ban tah matȉong ia ka TUR bad ban pyntlot bor ia ki kyndon jong ka Aiǹ RTI kaba ju ȉai jia na ka por sha ka por ha kaba ki bor ne tnat Sorkar ki ju pyrshang ban pynbudnam ne pyntieng ia ki nongshong shnong kiba pan RTI. Mynta kumne ruh ka paw ba i Mr. K. Hynǹiewta i thmu ban leh kumta ia ka TUR.
Ka TUR ka kwah ban pynpaw hangne ba kane kam dei ka sien kaba nyngkong ba i Mr. K. Hynǹiewta i pyrshang ban buhrieh ia ki jingtip ba la pan bad ka TUR ka kwah ban pyntip ruh ba wat ka State Information Commission ka la maham tyngeh ia i ha ka por ba don ka jingbishar halor ka jingujor ba ka TUR ka la ujor pyrshah ia ka jingbuhrieh bad jingpynslem ban ai jubab halor ki jingtip ba la pan. Ȋa ka order kaba ȉasoh bad kane ka jingmaham jong ka State Information Commission la thep ha ka thup hokmeghalaya.in. Ki kot ki sla ba ȉoh na ka ophis jong ka MIPA kiba la soi da i Mr. K. Hynniewta ki pynpaw ba dei ka MIPA hi kaba la khot jingȉalang ban ȉakren halor ka jingpyndonkam biang ia ki jaka Sorkar na ka bynta ki jingthmu kiba thymmai kumba la kdew mynshuwa bad ba la khot ia ki Department kiba pher ba kin wan sha kine ki jingȉalang. Baroh kine koi kot ki sla, kaba kynthup ia ki jingthoh na ki Seng bad ki kynhun Paidbah nongshong shnong kiba pher kiba la pynpaw ia ka jingpyrshah halor kane ka jingthmu jong ka Sorkar la thep ha kajuh ka thup hokmeghalaya.in.
I Mr. Hynǹiewta i ȉai bteng ban jler da kaba ong ba baroh ki jingtip kiba don ha ka ophis jong ka MIPA la sam paidbah ne lah ban ȉoh ha ki rynsan paidbah. Kane ka dei kaba shu thok bad ka ȉalam bakla shibun. Hynrei ym lap satia ia kita ki jingtip ha ki rynsan website kumba la kam da i Mr. K. Hynǹiewta bad ruh ka rukom treikam jong ka MIPA kam shym long kaba shai bad ka dei kane kaba la pynlong ia ka TUR ban wad jingtip lyngba ka Aiǹ RTI bad ban kdew ha ka appeal kaba nyngkong jong ka. La sot bad suh lang hangne ia ka bynta jong ka appeal kaba nyngkong jong ka TUR.
Kumta u kyrwoh jingpynshai jong i Mr Hynǹiewta ka pynpaw shai ba ka don ka jingthmu ban pynbudnam ia ka TUR bad ban pynduh bor ia ka hok jong ki nongshong shnong ba ki don lyngba ka Aiǹ RTI. Kynmaw ba ka Aiǹ RTI 2005 ka dei ka Aiǹ kaba ai ha ki nongshong shnong ia ka hok ban pynȉoh ia ka jingsynshar bad ka treikam treijam kaba hok, ba beit bad ba ai jingkheiǹ. Kum ki nongshong shnong ym tang ba ka dei ka hok jong ngi, hynrei ka dei ruh ka kamram jong ngi ban pyndonkam ia ki lynti jong ka Aiǹ bad ba ngi don ia ka hok ban pynpaw bad ban ȉashim bynta ha ka synshar khadar.
Hok Meghalaya 